वीरगंज , भाद्र २
अजित धामी
सर्लाहीमा प्रहरीले २२ किलो ८ सय २० ग्राम गाँजासहित दुई महिलासहित तीन जनालाई पक्राउ गरेको छ ।
प्रहरीले महेन्द्र राजमार्गअन्तर्गत लालबन्दी नगरपालिका–१, नवलपुरबाट उनीहरूलाई पक्राउ गरेको हो । हरिवन नगरपालिका–डाबरीबाट मधेस प्रदेश ०३–००१ ह २४४५ नम्बरको अटोमा गाँजा लिएर लालबन्दीतर्फ आउँदै गरेको अवस्थामा उनीहरू पक्राउ परेका हुन् । पक्राउ पर्नेमा अटो चालक हरिवन नगरपालिका–घुर्कौलीका ३० वर्षीय सुशील साह तथा अटोमा सवार २५ वर्षीया जगतारण साह र २५ वर्षीया राधिका साह रहेका छन् ।
जिल्ला प्रहरी कार्यालय सर्लाहीका प्रवक्ता एवं डीएसपी वेदप्रसाद गौतमका अनुसार अटोमा पाँचवटा पोकामा राखिएको २२ किलो ८ सय २० ग्राम गाँजा बरामद भएको हो ।
पक्राउ परेका तीनै जनालाई इलाका प्रहरी कार्यालय लालबन्दीको हिरासतमा राखेर थप अनुसन्धान भइरहेको प्रहरीले जनाएको छ ।
