वीरगंज , श्रावण २७
आदर्श कावरिया संघ पर्साले धार्मिक तथा सांस्कृतिक परम्परालाई निरन्तरता दिँदै त्रिवेणी धामबाट जल उठाएर पर्साको भाथाधाममा जलार्पण गरेको छ।
पटेर्वासुगौली गाउँपालिकाअन्तर्गत रहेको आदर्श कावरिया संघका सदस्यहरू ८० वटा मोटरसाइकलमा १६० जना सहभागी भई बिहीबार त्रिवेणी धामतर्फ प्रस्थान गरेका थिए। त्रिवेणी धाम, लुम्बिनीबाट पवित्र जल उठाएर उनीहरूले सोमबार भाथाधामस्थित शिव मन्दिरमा जलार्पण गरेका हुन्।
हरेक वर्ष धार्मिक यात्रामार्फत त्रिवेणीबाट जल ल्याएर भाथाधाममा चढाउँदै आएको संघले यस वर्ष पनि उक्त परम्परालाई निरन्तरता दिएको जनाएको छ।
यात्रामा संघका पूर्वअध्यक्ष राजेश्वर महतो थारु, कोषाध्यक्ष शम्भु प्रसाद थारु तथा सचिव बैजनाथ महतो लगायतको सहभागिता रहेको थियो। आयोजकका अनुसार धार्मिक यात्रामा करिब १६० जना सहभागी भएका थिए।
भाथाधाममा जलार्पण गर्दै सहभागीहरूले धार्मिक आस्था, सामाजिक एकता र आपसी सद्भाव कायम राख्ने सन्देशसमेत दिएका छन्।
