ओमप्रकाश चौधरी, सेढवा, १९ साउन/
पर्साको ग्रामीण क्षेत्रका बासिन्दाहरू साउन महीनामा विभिन्न धार्मिक एवं पर्यटकीय स्थलमा भ्रमण गर्न जाने क्रम बढेको छ ।
किसानहरूले वर्षेबाली धान रोपाइँ गरेर गोडमेल गर्ने कार्य पनि सकाएका कारण उनीहरू खेतीपातीपछि नेपाल र भारतका धार्मिक तथा पर्यटकीय स्थलको भ्रमणमा निस्किएका हुन् । साउनमा विभिन्न स्थानका शक्तिपीठहरूको दर्शन गर्दै आएका किसानहरू खेतीपातीको झन्झटबाट मुक्त भएपछि धार्मिक यात्रामा निस्किएका हुन् । अहिले सामुदायिक विद्यालयहरूमा पनि वर्षे बिदा भएकोले शिक्षकहरू पनि भ्रमणमा छन् । आर्थिकरूपमा सम्पन्न शिक्षक, विद्यार्थीहरू पनि राजधानी काठमाडौं, पर्यटकीय गन्तव्य पोखरा, तानसेन, बुटवल, भैरहवा, लुम्बिनी, धरान, इलाम, झापालगायतका ठाउँहरूमा भ्रमण गएका छन् । यसै महीनामा भारतको प्रसिद्ध बाबाधाम, वासुकिनाथ, अयोध्या, बनारस, कोलकाता, जगरनाथपुरी, गङ्गासागरलगायतका धार्मिक स्थलहरूमा जाने गरिन्छ । यस वर्ष नेपाल र भारतका धार्मिक तथा पर्यटकीय क्षेत्रमा पर्सा जिल्लाबाट जानेहरूको सङ्ख्या बढेको अनुमान गरिएको छ ।
जीराभवानी गाउँपालिका–१ पकडीटोलाका बस सञ्चालक दीपक चौधरीले ५० जना धार्मिक यात्रीहरूलाई लिएर भारतका विभिन्न स्थानको भ्रमणका लागि प्रस्थान गरेको बताए । उनले बिहार, झारखण्ड, पश्चिम बङ्गाल र उडिसा राज्यका विभिन्न धार्मिक तथा पर्यटकीय स्थलको भ्रमण गराउने बताए । भ्रमणका लागि गाडीको कागजपत्र, दूतावासको इजाजतपत्र, यात्रीहरूको नेपाली पहिचानपत्रका साथै कोभिडविरुद्धको खोप लिएको प्रमाणसहित यात्रीहरूलाई भारत लगिएको सञ्चालक चौधरीले बताए ।
जगरनाथपुर गापाको रामजानकी प्रावि बिजबनियाका शिक्षक हरिनारायण चौधरीसहित शिक्षकहरूको समूह दक्षिण भारत भ्रमणका लागि तीन दिन पहिले प्रस्थान गरेको पनि बस सञ्चालक चौधरीले जानकारी गराए ।
भारतका दिल्ली, मुम्बई, गोवालगायतका स्थान भ्रमण गर्ने योजनासहित टोली त्यसतर्फ प्रस्थान गरेको चौधरीले बताए । यसको अलावा गोरखपुर, अयोध्या, कानपुर, गजियाबाद, आगरा, लखनउहरिद्वार, ऋषिकेशलगायतका स्थानहरूका लागि पनि जिल्लाका विभिन्न पालिकाहरूबाट मानिसहरू जाने क्रम जारी छ । यसका साथै भारतको दार्जिलिङ्ग, सिक्किम र वैष्णोदेवीको दर्शनका लागि पनि मानिसहरू गइरहेका छन् ।
ग्रामीण क्षेत्रका मानिसहरू आर्थिक अवस्था अनुसार धार्मिक तथा पर्यटकीय क्षेत्रहरूको वार्षिकरूपमा अवलोकन भ्रमण गर्दै आएका छन् । वर्षभरिको तनाव भ्रमणबाट मेटिने अभिप्रायले सामथ्र्य अनुसारको यात्रा गर्ने क्रम पहिलेदेखि नै हुँदै आएको छ । दुई वर्षको कोरोनाले घरमैं बस्न बाध्य भएकाले यसपटक भने बाहिरिनेहरूको सङ्ख्या बढेको हो । भारतमा कोरोना सङ्क्रमण दर बढेकोले थुप्रैले त्यसतर्फको यात्रा परिवर्तन गरेका छन् भने कतिपयले छोट्याएका पनि छन् । जीराभवानी गापा अन्तर्गतको बाबा बटेश्वरनाथ कावरिया सङ्घको आयोजनामा एउटा टोली आज बुधवार त्रिवेणी जल भर्न गएको छ । सयौंको सङ्ख्यामा श्रद्धालु भक्तजनहरू प्रस्थान गरेको छ । एक साताको यात्रामा नेपाल र भारतका गरी दुई दर्जन गाउँका पाँच सयभन्दा बढी यात्रीको सहभागिता रहेको छ ।
यसका साथै पर्सा राष्ट्रिय निकुञ्ज अन्तर्गत दुधेश्वर महादेव मन्दिर, रामभौरी भाथा र ठोरीको भ्रमण गर्ने पनि बढेका छन् । हुलाकी सडक निर्माण भएकोले पछिल्लो समय ठोरीको भ्रमण गर्नेहरूको सङ्ख्यामा उल्लेख्य वृद्धि भएको छ ।
