नेपाली बजारमा सुनचाँदीको मूल्य फेरि बढ्यो, अहिलेसम्मकै महँगो

काठमाडौँ ८ पुस।
नेपाली बजारमा आज पनि सुन र चाँदीको मूल्य वृद्धि भएको छ। दुवै बहुमूल्य धातुको मूल्य बढेर हालसम्मकै उच्च विन्दुमा पुगेको नेपाल सुनचाँदी व्यवसायी महासंघले जनाएको छ।
महासंघका अनुसार आज सुनको मूल्य तोलामा ५ हजार ५ सय रुपैयाँले बढ्दै दुई लाख ६७ हजार २ सय रुपैयाँ पुगेको छ। यो मूल्य हालसम्मकै सबैभन्दा महँगो हो। यसअघि सोमबार सुनको मूल्य तोलामा ३ हजार ४ सय रुपैयाँले बढेर दुई लाख ६१ हजार ७ सय रुपैयाँ कायम भएको थियो।
गत शुक्रबार सुनको मूल्य तोलामा २ हजार रुपैयाँले घटेको थियो भने आइतबार १ सय रुपैयाँले ओरालो लागेको थियो। तर त्यसयता लगातार वृद्धि हुँदै दुई दिनमै सुनको मूल्य ८ हजार ९ सय रुपैयाँले बढेको हो।
त्यस्तै, चाँदीको मूल्य पनि आज तोलामा १ सय २० रुपैयाँले वृद्धि भएको छ। महासंघका अनुसार आज चाँदीको मूल्य तोलाको ४ हजार २ सय ५५ रुपैयाँ कायम भएको छ। यो मूल्य पनि हालसम्मकै उच्च हो।
विगत केही दिनदेखि अन्तर्राष्ट्रिय बजारको प्रभाव र मागमा आएको वृद्धिका कारण चाँदीको मूल्य निरन्तर बढ्दै आएको व्यवसायीहरूको भनाइ छ।