भारत–नेपाल मैत्री पुलमा भारत विकास परिषदद्वारा रोटरीकर्मीहरूको आत्मीय स्वागत, पोलियो उन्मूलन र नियमित खोपको सन्देश
रक्सौल। पोलियोमुक्त विश्व निर्माण गर्ने संकल्प तथा बालबालिकालाई नियमित खोप लगाउने विषयमा जनचेतना फैलाउने उद्देश्यले आइतबार नेपालकाे वीरगञ्जस्थित घण्टाघरदेखि भारतीय सीमावर्ती शहर रक्सौलसम्म जनचेतनामूलक र्याली निकालिएको छ।
२४ अक्टोबरदेखि सुरु भएको विश्व पोलियो उन्मूलन सप्ताहको समापनका अवसरमा रोटरी क्लब अफ वीरगञ्ज र रोटरी क्लब अफ वीरगञ्ज मेट्रोपोलिसको संयुक्त आयोजनामा उक्त र्याली निकालिएको हो। सीमावर्ती क्षेत्रमा पोलियोमुक्त समाज निर्माण र स्वस्थ भविष्यको सन्देश प्रवाह गर्ने उद्देश्यले आयोजित र्यालीमा दुवै देशका सामाजिक अभियन्ता तथा रोटरीकर्मीहरूको सहभागिता रहेको थियो।
रोटरी डिस्ट्रिक्ट रिजन–६ का पोलियो प्लस कमिटी चेयर अभिषेक चौधरी, रोटरी क्लब अफ वीरगञ्जका अध्यक्ष राकेश मिश्रा तथा रोटरी क्लब अफ वीरगञ्ज मेट्रोपोलिसका अध्यक्ष राजकिशोर कलवारले र्यालीको नेतृत्व गरेका थिए। कार्यक्रममा रोटरीका पूर्वअध्यक्ष सोहन पोद्दार, डा. आनन्द कुमार झासहित ठूलो संख्यामा रोटरीकर्मी, रोट्र्याक्टर्स, इन्टर्याक्टर्स, युवा तथा सामाजिक कार्यकर्ताहरू सहभागी भएका थिए।
मोटरसाइकल, स्कुटी तथा चारपाङ्ग्रे सवारीसाधनको र्याली वीरगञ्जको घण्टाघरबाट सुरु भई भारत–नेपाल मैत्री पुल हुँदै रक्सौलको राजदण्डी पुगेको थियो। र्यालीमा सहभागीहरूले पोलियो उन्मूलन, बालबालिकाको नियमित खोप तथा प्रत्येक बालबालिकालाई पोलियो खोपको मात्रा सुनिश्चित गर्नुपर्ने सन्देश दिएका थिए।
र्याली रक्सौल पुगेपछि भारत–नेपाल मैत्री पुलनजिक भारत विकास परिषद्, शाखा रक्सौलले रोटरीकर्मी तथा विशिष्ट अतिथिहरूको आत्मीय स्वागत तथा सम्मान गरेको थियो। परिषद्का अध्यक्ष रजनीश प्रियदर्शीको अध्यक्षता तथा सेवा संयोजक एवं सञ्चार प्रभारी बिमल कुमार सर्राफको संयोजनमा आयोजित कार्यक्रममा दुवै देशका सामाजिक संस्थाबीचको आपसी सहयोग, सद्भाव र मैत्रीपूर्ण सम्बन्ध झल्किएको थियो।
कार्यक्रममा परिषद्का अध्यक्ष प्रियदर्शीले रोटरी क्लब अफ वीरगञ्ज, रोटरी क्लब अफ वीरगञ्ज मेट्रोपोलिसका पदाधिकारी तथा इनर ह्वीलकी अध्यक्षलाई भारत विकास परिषद्को ल्यापल पिन प्रदान गरी सम्मान गरेका थिए। त्यसैगरी रोटरीका पदाधिकारीहरूले पनि परिषद्का अध्यक्षलाई मायाको चिनो तथा पोलियो जनचेतना पिन प्रदान गरेका थिए।
कार्यक्रममा रोटरी डिस्ट्रिक्ट रिजन–६ का पोलियो प्लस कमिटी चेयर अभिषेक चौधरीले पोलियो उन्मूलन रोटरी इन्टरनेसनलको प्रमुख विश्वव्यापी सेवामूलक अभियानमध्ये एक रहेको बताए। उनले दशकौँदेखि रोटरीले अन्तर्राष्ट्रिय साझेदार संस्थाहरूसँग सहकार्य गर्दै पोलियोविरुद्ध अभियान सञ्चालन गरिरहेको उल्लेख गरे।
उनका अनुसार विश्वका अधिकांश क्षेत्रलाई पोलियोमुक्त बनाउन रोटरीको महत्वपूर्ण योगदान रहेको छ। पोलियोमुक्त विश्वको लक्ष्य पूरा गर्न अन्तिम बालबालिकासम्म खोपको पहुँच पुर्याउनुका साथै समाजका प्रत्येक व्यक्तिले आफ्नो जिम्मेवारी पूरा गर्न आवश्यक रहेको उनले बताए। भारत र नेपालबीच संयुक्त रूपमा सञ्चालन गरिएको यस्तो अभियान सीमाभन्दा माथि उठेर मानवीय सहयोग र सामाजिक उत्तरदायित्व निर्वाह गर्ने उदाहरण भएको उनको भनाइ थियो।
भारत विकास परिषद्का अध्यक्ष रजनीश प्रियदर्शीले पोलियो उन्मूलन कुनै एउटा देश वा संस्थाको मात्र अभियान नभई सम्पूर्ण मानव समुदायको स्वस्थ र सुरक्षित भविष्यसँग जोडिएको साझा संकल्प भएको बताए। भारत र नेपालबीच लामो समयदेखि सांस्कृतिक, सामाजिक तथा पारिवारिक सम्बन्ध रहँदै आएको उल्लेख गर्दै उनले जनहितका अभियानमा दुवै देशका सामाजिक संस्थाको सहभागिताले आपसी सम्बन्धलाई थप मजबुत बनाउने बताए।
उनले भारत विकास परिषद् ‘नर सेवा नारायण सेवा’को भावनाअनुसार सेवा, संस्कार र सामाजिक सद्भावका क्षेत्रमा निरन्तर रचनात्मक गतिविधिमा सहभागी रहने प्रतिबद्धता पनि व्यक्त गरे।
कार्यक्रममा रक्सौल अनुमण्डलीय अस्पतालकी उपाधीक्षक डा. स्वाति सपन तथा डा. विजय कुमारले दुवै देशका सामाजिक संस्थाले संयुक्त रूपमा सञ्चालन गरेको अभियानको प्रशंसा गरे। पोलियो उन्मूलनजस्तो महत्वपूर्ण विषयमा सीमावर्ती क्षेत्रका संस्थाहरू एकजुट भएर जनचेतना फैलाउनु सकारात्मक पहल भएको उनीहरूको भनाइ थियो।
त्यसैगरी हरैया थानाका थानाध्यक्ष किशन पासवानले र्याली सफल बनाउन महत्वपूर्ण भूमिका निर्वाह गरेका थिए। उनले भारत विकास परिषद् र वीरगञ्जका दुवै रोटरी क्लबको संयुक्त प्रयासलाई जनहितमा सराहनीय पहलका रूपमा उल्लेख गरे।
परिषद्का सेवा संयोजक एवं सञ्चार प्रभारी बिमल कुमार सर्राफले पोलियोजस्तो गम्भीर रोगबाट बच्न जनचेतना, समयमै खोप तथा समाजका सबै वर्गको सहभागिता आवश्यक रहेको बताए। भारत र नेपालका सामाजिक संस्थाबीचको सहकार्यले स्वास्थ्य सचेतनासँगै आपसी सहयोग र मानवीय संवेदनाको सन्देश दिएको उनले बताए।
यसैबीच रोटरी क्लब अफ वीरगञ्ज र रोटरी क्लब अफ वीरगञ्ज मेट्रोपोलिसका पदाधिकारीहरूले भारत विकास परिषद्, शाखा रक्सौलले गरेको स्वागत तथा सम्मानप्रति आभार व्यक्त गरेका थिए। उनीहरूले पोलियोमुक्त विश्वको सपना साकार पार्न प्रत्येक नागरिकले यस अभियानलाई आफ्नो जिम्मेवारीका रूपमा लिनुपर्नेमा जोड दिएका थिए।
कार्यक्रमको सञ्चालन परिषद्का कोषाध्यक्ष सुनील कुमारले गरेका थिए। कार्यक्रममा अजय कुमार, नीतेश कुमार सिंह, सीताराम गोयल, सुभाष अग्रवाल, विजय कुमार साह, विनोद कुमार, दिनेश प्रसाद, सुरेश धानोठिया, अरविन्द जायसवाल र शरद सर्राफलगायत भारत विकास परिषद्का सदस्यहरूको उपस्थिति रहेको थियो।
कार्यक्रमबारे जानकारी परिषद्का सेवा संयोजक एवं सञ्चार प्रभारी बिमल कुमार सर्राफले दिएका हुन्।
पोलियोमुक्त विश्वको संकल्पसहित वीरगञ्जदेखि रक्सौलसम्म जनचेतनामूलक र्याली
प्रतिक्रिया लेख्नुहोस
