बीरगंज , कार्तिक ९
पर्साको ठोरी गाउँपालिकाले कार्यालय प्रयोजन तथा विभिन्न योजना र निर्माणसम्बन्धी शीर्षकमा इन्धन खरिदका लागि १ करोड ८ लाख १ हजार १२४ रुपैयाँ भुक्तानी गरेको छ।
महालेखा परीक्षकको प्रतिवेदनअनुसार तटबन्ध, बाँध निर्माण तथा ग्रामीण सडक स्तरोन्नतिलगायतका शीर्षकबाट मात्रै ८५ लाख ३५ हजार १२४ रुपैयाँ इन्धनमा खर्च गरिएको छ।
तर, कुन योजनाका लागि कति इन्धन आवश्यक पर्ने र कति खर्च गर्ने भन्ने विषयमा गाउँ कार्यपालिकाबाट बजेट विनियोजन वा स्पष्ट निर्णय नगरी इन्धनका बिलका आधारमा भुक्तानी गरिएको प्रतिवेदनमा उल्लेख छ।
योजनागत रूपमा इन्धन खर्चको सीमा निर्धारण तथा स्पष्ट निर्णयबिना बिलका आधारमा भुक्तानी गर्दा खर्चको औचित्य र पारदर्शितामाथि प्रश्न उठ्न सक्ने देखिन्छ। सार्वजनिक रकमको प्रभावकारी उपयोग सुनिश्चित गर्न योजनाअनुसार बजेट विनियोजन, इन्धन खपतको मापदण्ड निर्धारण र खर्चको उचित अभिलेख राख्न आवश्यक देखिन्छ।
